STELLA OG DELINA, AMMING
OG SJEKKLISTE.
Har i løpet av tida eg
har vore her har eg blitt kjent med ein del pasientar, i større
eller mindre grad. Dei fleste er på sjukehuset nokre dagar før dei
set seg på ein minibuss, leiger ein sykkeldrosje eller går heim på
eigne bein. Få blir henta i privatbil. Drosjer må ein heilt til
Lilongwe, 6 mil unna for å få tak i. Tenker reisa heim for mange er
slitsam. Gjerne berre dagar etter ein operasjon, kanskje med ein
nyfødd unge. Bussane går når dei er fulle. Og då meiner eg
stappfulle. Av folk, ting og tang. Veit at nokre kan ha med både
høner og geiter, men har eg ikkje opplevd sjølv. Jau foressten ei
ung dame hadde med ei høne sist eg tok bussen, hovudet stakk ut av
sida på ei lita pappeske. Ikkje uvanleg å vente minst ein time på
at den skal fyllast. Stort sett sit folk så tett og har så mykje
med seg at det er vanskeleg å røre seg. Føter og skuldrer kan
kjennast som å sitje i ei skrustikke. Når ein skal av kan det ta
tid når mange må flytte på seg og alt dei har med av bagasje. Eg
som er frisk kan enno synest det kan vere ein oppleving. Prate med
folk, eller berre sitje å vente. Gjerne medan eg strikker litt, det
er som regel armslag til det medan bussen fyllest.
Stella og Delina er to har
eg blitt godt kjent med. Har fått lov å fortelje hennar historie
og vise bilete.
For nokre veker sidan
under ein keisarsnittoperasjon fekk Stella hjartestans. Bedøvinga
som skulle gå til nedre del av kroppen, gjekk opp og lamma hjarte og
lunger. Også andre ting gjekk gale. Blant anna utstyret som skulle
registrere blodtrykk og puls fungerte ikkje. Dette ville truleg aldri
skjedd i eit vestlege land. Det er sørgjeleg å sjå at mykje dyrt,
donert medisinsk utstyr blir øydelagt av ustabil tilførsel av
straum. Ingeniørar i Norge er sett på saka for å sjå på mogelege
alternativ for å kunne stabilisere straumen. Straumen går stadig
vekk. Den kjem tilbake med ujamn styrke noko som lett øydelegg
elektronikk.
Stella og mor hennar
Stella var i koma dei
første dagane. Deretter vakna ho utan å kunne kommunisere. Dei to
første vekene var det lite framskritt å sjå. Eg tenkte med gru på
korleis det ville gå framover. I ein landsby utan gode senger,
heimesjukpleie, sondemat og så bortetter. Det
kom truleg til å oppstå komplikasjonar
som ville bli hennar bane.
Den lille jenta Delina var
heldigvis sunn og frisk. Ho hadde bruk for mor si, ikkje minst for å
få trygg og god næring den første tida. Amminga kom heldigvis i
gang etterkvart. Den lille jenta var roleg og sov mykje. Dette førte
til at ho vart lagt sjeldan til brystet og gjekk ned i vekt. Det såg
ut som dei pårørande var glad for at barnet sov mykje. Dei hadde
hendene fulle med å pleie den sjuke som i periodar var svært
uroleg. Eg hadde også andre pasientar å ta meg av, slik at eg ikkje
fekk fylgt familien så tett som dei hadde behov for. Fann dermed
ut eg skulle lage ei sjekkliste for å skaffe meg oversikt over kor
ofte barnet vart lagt til brystet. Laga liste med datoar nedover på
arket og ba familien setje eit merke når barnet hadde fått mat. Dei
nikka og smilte og såg ut til å forstå. Etter nokre timar såg eg
at dei hadde kryssa i hytt og ver på arket. Det viste seg at dei
verken kunne lese eller skrive. Morsmjølkerstatning er å få
kjøpt. Det er svært kostbart, og krev tilgang på reint vatn og
reine tåteflasker. Å skulle koke vatn mange gonger for dagen på
kostbart trekol eller ved er ikkje lett å få til i praksis. Veit at
mange dermed lett slurvar med reinhald. Det kostar mange spedbarn
livet å få ein kraftig diare. Det er derfor av avgjerande her at
barn får bryst-ernæring. Her der så og seie alle kvinner ammer
barna sine er det ikkje vanlege å donere morsmjølk. HIV pandemien
gjer at dette ikkje blir tilrådd av helsepersonell.
Stella og den lille jenta
var døgnet rundt omgitt av mor, svigermor, og av og til andre i
familien. Noko som må ha vore trygt for henne. Dei pårørande vart
meir og meir slitne. Ei streng praksis på antal besøkande gjorde at
dei næraste ikkje fekk den avlastinga dei trong. Dei hadde bruk for
både assistanse og opplæring i korleis pleie henne. Dette fekk eg
lov å delta i. Malawiske sjukepleiarar har lite med stell og pleie å
gjere. Mi erfaring frå sjukepleie i Norge kom til nytte. Mannen
hennar kom to gonger. Han jobbar på anlegg i eit naboland. Reisa
hit kosta han både mykje tid og pengar. Familien var fortvila. Håpte
på betring sjølv om det ikkje såg slik ut den første tida.
For å gjere ein lang
historie kort; språk, og større og større førlig-heit kom etter
nokre veker. Ho kunne fortelje om det ho hugsa frå tida då ho
ikkje evna å kommunisere med omverda, og kor frykteleg det var å
ikkje kunne snakke. Og ikkje minst om redsla ho hadde kjent på.
Stella reiste heim etter å ha fått taleevna tilbake og kunne gå
med støtte .Ho kom dessverre ikkje opp til kontrolltimen etter 14
dagar. Kanskje ikkje så rart. Turen til sjukehuset var lang. Heim
kom ho seg ved hjelp av buss og det siste stykket skulle ho bli
henta av ei oksekjerre. Eg hadde svært lyst å treffe henne igjen,
var blant anna spent på om ho kunne gå utan hjelp. Utruleg flott
å vere med på denne « reisa» i lag med Stella og familien. Som
«sunnivasøster» er ikkje det ofte eg får oppleve noko særleg
betring hos pasientane. Og her i dette landet ville ho ikkje ha
muligheiter om ho ikkje kom seg. Stella dukka opp veka etter og kom
spaserande stødig på sine to bein.
Agness ein
sjukepleiarstudent som hadde vore til god støtte for Stella og
familien, og som tolk for meg, forslo at vi kunne besøke henne ein
gong heime. Stella og mor hennar sa vi var velkommen når som helst.
NAMNEVALG OG TRADISJONAR
Jenta fekk namnet Delina
etter ei oldemor. Før namnet vart bestemt hadde ho eit anna namn.
Det er i Malawi vanleg at
faren finn namn til den førstefødde. Ettersom faren var bortreist i
samband med jobb tok dette litt tid. Etter det første besøket av
denne beskjedne unge faren, spurte eg mor hans om jenta hadde fått
namn. Ho fortalte at det hadde ho, men ho ville ikkje fortelje kva
det var. Eg vart svært nysgjerrig. Kunne ikkje skjønne kvifor ho
ikkje ville seie kva det var. Etter ei stund oppga ho namnet og ein
av dei tilsette fortalte at namnet betydde freisting. Det kom fram at
svigermor til Stella hadde lagt sterke føringar for namnevalet.
Reknar med ho var opp-brakt over blant anna kva situasjon sonen var
kommen i. Er ikkje uvanleg her i landet at barn får namn etter
omstende rundt for eksempel fødselen. Synest å hugse at « Oluf»
Arthur Arntsen har fortalt om liknande praksis i Nord Noreg.
Ein klok og omsorgsfull
hjelpepleiar hjelpte meg med å diskutere med familien om det var
lurt å gi barnet eit namn som kunne bli til belastning for henne.
Eit slikt namn ville kunne gi barnet skuld for det som var hent med
mora. Etter å ha tenkt seg om ei tid vart namnet endra til Delina.
Eit namn eg trur alle var nøgd med.
BESØK HEIME HOS STELLA,
SUKKER OG SALT
Agness som
sjukepleiarstudent på avdelinga må ha praksis mange helgar. Sist
helg hadde ho fri og foreslo at vi kunne ta ein tur å besøke Stella
laurdag. Vi drog avgarde saman med besøkande frå Norge. Dei som no
er i Nkhoma for nokre veker er sjukepleiar Marit, legen Guntram,
begge er ressurspersonar i prosjektet, og Anne Marit, tidlegare
kollega. Fleire av desse hadde møtt Stella tidlegare. Vi avtalte at
om det såg ut til å virke overveldande på familien at vi kom
mange, kunne nokon trekke seg unna. Er ikkje lett å vite kva som kan
opplevast som greitt eller ikkje for andre. Vi var alle nysgjerrige
på korleis ein vanleg familie lever på landsbygda, men ville
sjølvsagt unngå at det vart ubehageleg på nokon måte for familien
vi besøkte.
Eg sa til Agness at vi
ville kjøpe med ei gåve til mor og barn og nokre kjeks og ein pakke
te. Agness ba meg sløyfe kjeks og te. Heller kjøpe ein pose med
sukker og salt. Noko som kunne brukast i matlaginga. Vi kjøpte
sukker og salt, men valte også å ta med luksusartiklane kjeks og
te.
Vi hadde ikkje vanskar med
å finne landsbyen og huset med hjelp av nokre som kjente familien.
Stella og den lille jenta bur i lag med foreldra og dei fire små
søskena hennar i to hus som står tett i tett.
Vi vart godt mottatt. Dei
hadde ikkje trudd at vi nokonsinne verkeleg ville komme på besøk.
Ei matte av strå vart lagt ut slik at vi fekk sitje på reint
underlag ute i tunet. Ein stor flokk naboungar og nokre kvinner var
plutseleg der og såg på dette merkelege med dei 4 kvite som kom
til landsbyen. Enno er ikkje Stella heilt den same som før. Noko som
på fleire område er krevjande for henne og dei næraste. Ein del
ting må truleg lærast på nytt. Eg ser ikkje bort frå at det blir
nok ein tur for å sjå til korleis det går med Stella, Delina og
resten av familien. Det har gjort sterkt inntrykk å sjå på nært
hald både denne familien, og andre som har så lite at dei har knapt
med mat, og kleda er så slitt at dei ikkje lenger heng saman og er
umogeleg å reparere.